ممثلي شخصية لوكي
 
بما ان مسلسل لوكى بيتعرض حالياً فحابب أتكلم عن توم هيدلستون فى دور لوكى و مدى جمال الشخصية و تمكنه الكبير منها و اللى فى رأيى لولا امكانياته التجسيدية و قدرته على التنويع بالشكل المرعب ده بنفس الشخصية كان زمان شخصية لوكى انتهت بالنسبالنا من بعد فيلم Avengers مثلاً .
توم هو واحد من الممثلين البريطانيين الشاطرين و اللى عارفين أدواتهم كويس و بيعرفوا يعملوا ايه امته و ازاى و هو أثبت ده أكتر من مرة خلال أعمال كتير و لكن خلونا مع شخصية لوكى اللى خدت أكتر من منحنى حاد شويتين .
 

مسلسل لوكي

 
فى البداية و فى فيلم ثور الأول شوفنا لوكى و اتعرفنا عليه و الفيلم قدمه بشكل كويس جداً لينا كشرير مش من اللى هتنساهم بسرعة و اكتشفنا ان ده كان تمهيد عشان يكون الشرير الرئيسى فى واحد من أفضل أفلام عالم مارفل حتى الآن The Avengers الجزء الأول و يمكن هنا شوفنا أجمل و أقوى مراحل شخصية لوكى فى رأيى الشخصى ، لوكى كان شخصية مرعبة و حيله لا تنتهى و توم هيدلستون جسد ده ببراعة شديدة قدر يخلد بيها الدور ده وسط أفضل اشرار عوالم السوبر هيروز عموماً.
 

لوكي إله الخداع

 
بعد فيلم Avengers ابتدت شخصية لوكى تاخد طابع هزلى و الطابع الهزلى ده يمكن غطى كمان على أهم جوانب لوكى و هى "الخداع" خاصة فى فيلم Thor Ragnarock و اللى منكرش انه يمكن من أكتر أفلام مارفل اللى ضحكتنى و الروح اللى حطها فيه المخرج تاى كواتيتى كانت شئ فريد لكن بالرغم من ده تغير الشخصية بالشكل ده كان ممكن فعلاً يدمرها جماهيرياً تماماً لأن ببساطة مش ده لوكى اللى حبيته فى الأول و هنا ييجى دور توم هيدلستون اللى بيثبت فيه ان اختيار الكاست بشكل كويس بيفرق كتير على المدى الطويل فى النوعية دى من الشخصيات 
 

الممثل لوكي

 
توم بيعرف يجمع ما بين الكوميديا و الغموض و الدراما بشكل مبهر فى الشخصية و بيقدر أحياناً يقدمهم كلهم فى نفس المشهد و يمكن ده حصل فى المسلسل بشكل مكثف كمان و التنوع اللى حط أسسه من البداية و قدر يمشى عليه فى انه يغير المقادير مع كل فيلم عشان يقدر يتداخل مع العمل بشكل كامل من غير ما يغير الطبخة ولا يأثر على النكهة الخاصة للشخصية .
❤️‍🔥
المسلسل بيقدملنا لوكى فى أول عمل من بطولته و المرادى مش فيلم ساعتين لا ده مسلسل كامل بنستكشف فيه أكتر عن لوكى نفسه و دواخل شخصيته و الجميل كمان انه مكمل من عند نسخة لوكى ما بعد فيلم Avengers اللى زى ما ذكرت هى أفضل نسخه فحتى الآن أنا مبسوط جداً فى المسلسل خاصة مع تقديم قوة كونية جديدة هتغير نظرتنا للعالم ككل و بشكل عام مسلسل لوكى بالرغم ان اللى نزل منه ٣ حلقات بس لكن هو المفضل عندى وسط المسلسلات الثلاثة لعالم مارفل حتى الآن
 
المصدر 

Mohamed Hesham