تقييم مسلسل ما وراء الطبيعة

تقييم ل مسلسل ما وراء الطبيعة احمد امين خلصت المسلسل أخيرا.. وإن شاء الله في ريفيو قريب ولكن سريعا كده.. ١- أحمد خالد توفيق كاتب عبقري.. قدرنا قيمة كتاباته فعلا لما شوفناها على الشاشة.. وحقيقي شيء يحزن انه ماحضرش اللحظة دي ٢- المسلسل ده ماكنش ينفع يتعمل زمان.. المسلسل ده كان لازم فعلا يتصرف عليه الصرف ده.. عشان يطلع بالشكل ده.. ٣- عمرو سلامة كان مصدر قلق كبير ليا.. خصوصا إن الروايات معقدة الجوانب... ونقلها للشاشة صعب.. ٤- عمرو سلامة أخلص للمسلسل ده الصراحة جدا.. وواضح جدا انه كان همه الشاغل.. الراجل أبدع في أغلب جوانب المسلسل.. وطلعه بصورة رضتني كقارئ وكمشاهد ٥- الجرافيك زي الزفت ماعرفش ازاي اصلا نيتفليكس قبلت بالجرافيك ده يتعرض على منصتها ٦- المزيكا تقريبا نص سبب نجاح المسلسل.. في مشاهد زي موت رضا.. وإلقاء حتى تحترق النجوم كان مستحيل يبقوا بالعظمة دي من غير المزيكا ٧- المسلسل اعظم ما فيه إنه اخد الطابع الشرقي.. وده عكس اللي كان في البرومو.. ٨- الجرافيك يقرف اقسم بالله ٩- ماجي وجودها كان دخيل اوي.. يعني لو كانت ظهرت في اخر حلقتين كان هيبقى احسن بكتير ١٠- المزيكا عالمية ١١- المسلسل فيه اخطاء ومشاكل كتير.. بس ده لما تيجي تقارنه بأعمال عالمية.. مش بالبرنس واعمال الفنانة ياسمين صبري ١٢- " ما وراء الطبيعة" يدي مسلسل "the haunting of the hill house" بالجزمة اللي كان انتاج نيتفليكس برضه ١٣- التمثيل كان عظيم.. العيال الصغيرة دول اكيد ولاد الكاست عشان مافيش مبرر انهم يمثلوا اصلا غير كده.. ما عدا شيراز طبعا.. ده غير اني ماتخيلش ان رفعت وهو صغير ده.. هيكبر يبقى احمد امين.. في واسطة اكيد.. المخرج لو كان شاف مسلسل Dark أكيد كان اجتهد اكتر من كده شوية في اختيار الاطفال ١٤- رفعت اسماعيل في الرواية شخصية مش كئيبة وضعيفة زي المسلسل.. ولكن أنا حبيت الدراما اللي في المسلسل وأداء أحمد امين عظيم ١٥- المشاهد الدرامية اللي في المسلسل عظيمة.. جبارة.. مبهرة.. صحيح الرواية ماكنتش كئيبة كده.. بس المشاهد مبهرة فعلا اكتر من اي عمل درامي مصري ممكن تشوفه في اخر فترة.. ومش هأفور لو قولت عالمي ١٦- شخصية هويدا اللي رفعت كان بيوصفها في الرواية غير في المسلسل تماما.. ومع ذلك أنا حبيت الشخصية جدا.. فمش عارف أحدد هل كده أحسن.. ولا نلتزم بالنص.. ١٧ - بشاري مدير التصوير أنا ماعرفوش ولكن يا ريت حد يوصله ويقوله انه لو الصورة مش بالجودة دي كان المسلسل قلب على فيلم التعويذة ١٨- الناس اللي بتربط بين المسلسل وبين مسلسل لوسيفر عندها لبس.. شخصية "لوسيفر" كانت عمود أساسي في سلسلة ما وراء الطبيعة.. وكان بينهم صراعات كتير اتكتبت في الروايات من قبل تقريبا ما مؤلف مسلسل لوسيفر يسنن ١٩ - أنا حبيت المسلسل جدا.. واتمنى اني اشوف جزء تاني وتالت.. وعقبال مانشوف بقى رجل المستحيل وسافاري وملف المستقبل وفارس الأندلس وباقي السلاسل العظيمة دي قريب عالشاشة سلام

اليوم خلصت هاد المسلسل يلي عمل نقلة كبيرة للدراما العربيه المسلسل حلو ومختلف بالرغم من وجود كم حلقة حسيتهم مو قد المستوى وفيهم شوية غباء زي الحلقه الثانيه والثالثه بعد هيك بيرجع بصير قوي كثير وحلو واحلى حلقة برأي هي الرابعه الموسيقى فيو حلو وبتحمس الجرافيك فيو شوية غباء وهاد اشي خلاني استغرب كونه انتاج نيتفليكس المسلسل ممتع وشيق بنصحكم فيو معلومة بسيطه ماغي زنخه كثير ودمها ثقيل معلومه ثانيه لا تحضره لحالك مش لانه مرعب لا بس عشان وانت تحضر فيو بتحب يكون معك حدا تحكيله شفت شو صار ولك وبعتذر عالاطالة

"يعرض مسلسل "ما وراء الطبيعة" مترجماً إلى أكثر من 32 لغة في 190 دولة حول العالم. كما سيتم توفير الدبلجة إلى أكثر من 9 لغات من بينها اللغة الإنجليزية، الإسبانية، الفرنسية، التركية والألمانية وغيرها. وسيكون أول مسلسل أصلي مصري متوفر بالوصف الصوتي باللغة العربية لضعاف البصر والمكفوفين، والوصف النصي باللغة العربية لضعاف السمع."